ل رێکەفتی 12 - 11 - 2024، ل هۆلا کۆنفرانسان یا زانکۆیا دهۆك، پشكا ئامار و زانیاری ل كۆلیژا كارگێری وئابووری روینشتنەكا گەنگەشێ ئەنجامدا لژێر ناڤ ونیشان (سەرژمێریا گشتی یا عیراقێ و باندۆرا وێ لسەر هەڕێما کوردستانێ) و ب ئامادەبوونا د. لوقمان هادی، هاریکارێ سەرۆکێ زانکویێ بۆ کاروبارێن زانستی و د.بەسام احمد، راگرێ کۆلیژا کارگێری و ئابووری، و د. خالد سەلیم، ئەندامێ پەرلەمانێ عیراقێ و هژمارەکا ئەکادیمی و ماموستایێن زانکویێ ب رێڤەچوو.

ل دەستپێكێ، د. نصرالدین حاج صالح، مامۆستایێ پشكا ئامار و زانیاری باس ل مێژوو و گرنگیا ئەنجامدانا سەرژمێریا گشتی یا عیراقێ کر و گۆت: "ئەنجامدانا سەرژمێریا گشتی ل عیراقێ پرۆسێسەکا شارستانی یە و گرنگیەکا زۆر هەیە بۆ کۆمکرنا زانیاریان د هەمی بواراندا.

ل دویڤ دا، د. ئازاد عادل شەریف، مامۆستایێ پشكا ئامار و زانیاری باس ل گرنگیا ئەنجامدانا سەرژمێریا گشتی ل عیراقێ كر ژ بۆ ئەگەرێن گەشەپێدانێ وپەروەردێ و کۆنترۆلكرنا بەلانسێ رێژا ئاکنجیبوونێ و ئاماژە ب رێکێن ئەکادیمی یێن دهێنە وە رگرتن ژ ئەنجامێن سەرژمێریا گشتی دا و مفا یا وێ بۆ وەزارەتا پلاندانانێ.

و هەر دڤی روینشتنێ دا، مامۆستا رافع مەحەمەد، بەرپرسێ راگەهاندنێ ل رێڤەبەریا ئامارا دهۆکێ ل دۆر رێکار و رێنمایێن حکومەتێ بۆ بجهئینانا ڤێ پروسێسێ وشرۆڤەکرنا فورمێن تایبەت و کارێن فەرمانبەرێن وان ل روژێن سەرژمێریێ پەیڤەك دا و هەروەسا باس ل دانا ئاموژگاریان بۆ هاوەلاتیان ل رۆژێن سەرژمێریێ كر وداخواز کر کو هاوەلاتی هاریکار بن د گەل تیمێن وان دا کو باشترین شێوە ئەڤ پرۆسێسە بهێتە ئەنجامدان.

ژ لایێ خو ڤە، مامۆستا خالد ئەحمەد، مامۆستایێ زانکۆیێ و تایبەتمەندێ جوگرافیایێ ل دۆر باندۆرا سەرژمێریا گشتی ل هەرێما کوردستانێ رۆناهی ئێخستە سەر وەرگرتنا خالێن ئەرێنی و نەرێنی سەبارەت مافێن یاسایی و جوگرافی وەکو دۆکیومێنت و چەوانیا وەرگرتنا مفایێ ژ ڤێ پروسێسێ.

ل دۆماهیا ڤێ روینشتنێ، د. خالد سلیم ئەندامێ پەرلەمانێ عیراقێ ل دۆر ئالیێن ئاستەنگ بەرامبەر پەرلەمانتارێن کورد ل بەغدا ل سەر داخوازکرنا مافێن دەڤەرێن کوردستانێ و دەرڤەی هەرێمێ و پشتراستکرنا وان مافان پشتی ئەنجامدانا سەر ژمێری یا گشتی ئاخفت.

پشتی هەمی پەیڤداران نامێن خو گەهاندینە ئامادەبوویان، دانوستاندنێن چالاك د ناڤبەرا ئامادەبوویان دا ب رێڤەچوون و هیڤی خواستن هەمی هاوەلاتی د هاریکار بن ژ بۆ سەرئێخستنا ڤێ پرۆسێسێ.

بۆ دیتنا وێنە و دیمەنان، لینکێ ل خوارێ کلیک بکە:

https://drive.google.com/drive/folders/1eYM-w6EfjqMc2KB6RpMXRIMnGI7j0HAk?usp=sharing